Minamahal na user,
Welcome sa Huawei Health.
Ang mga sumusunod na tuntunin sa kasunduang ito sa Kasunduan sa Huawei Health (magmula dito ay tatawaging "Kasunduan") ay bumubuo ng legal na kasunduan sa pagitan mo at ng Huawei Technologies Co., Ltd. at ng mga subsidiary nito (magmula dito ay tatawaging "Huawei"). Isinasaad ng Kasunduang ito ang iyong mga legal na karapatan at responsibilidad kaugnay ng paggamit ng Huawei Health, at ng mga kaugnay na software, serbisyo at website (magmula dito ay tatawaging "Serbisyo"). Sa Kasunduang ito, gagamitin ang salitang "ikaw" para sa sinumang indibidwal na gagamit at/o mag-a-access ng Serbisyong ito.
Bago gamitin ang Serbisyong ito, dapat mong sang-ayunan ang mga tuntunin sa Kasunduang ito, ang Patakaran sa Privacy ng Huawei at anumang mga kaukulang kasunduan sa pagitan mo at ng Huawei (magmula dito ay tatawaging "Mga Tuntunin"). Pakitiyak na babasahin mo nang mabuti ang mga sumusunod na tuntunin at mamarkahan mo ang check box sa ibaba para isaad na nabasa at sinasang-ayunan mo ang mga tuntuning ito. Kung hindi mo sasang-ayunan ang lahat o bahagi ng mga tuntunin, hindi mo magagamit, at hindi mo rin dapat subukang gamitin ang Serbisyong ito.
1. Pagprotekta sa data
Iginagalang at pinoprotektahan ng Huawei ang personal na privacy ng lahat ng user ng Huawei Health, pati na rin ang iyong personal na impormasyon (gaya ng iyong palayaw, larawan sa profile, kasarian, edad, numero ng telepono o email address) at ang iyong personal na data na pangkalusugan (gaya ng data ng pag-eehersisyo, pagtulog, timbang, at bilis ng pintig ng puso). Hindi ilalahad, ililipat o ibibigay ng Huawei ang nasabing impormasyon sa anumang third party nang wala ang iyong pahintulot, maliban na lang kung iniaatas ng mga naaangkop na batas at regulasyon ang sapilitang paglalahad nito. Hindi rin gagamitin ng Huawei, at wala rin itong intensyong gamitin ang data ng pag-eehersisyo, timbang, pagtulog at/o iba pang data sa cloud para sa iba pang mga bagay. Iniimbak sa cloud ang impormasyon para matiyak ang seguridad ng data.
2. Mga serbisyo ng third-party
Ang iyong carrier o iba pang mga third party ay maaari ding maghatid ng mga kaukulang produkto at serbisyo gamit ang platform ng Huawei Health, gaya ng mga app at service content ng third-party. Sa pamamagitan ng paggamit ng mga nasabing produkto at serbisyo ng third-party, kinukumpirma mong sumasang-ayon ka sa mga tuntunin ng serbisyo na itinakda ng third party. Lubos naming inirerekomenda na basahin mo nang mabuti ang content ng mga kasunduan sa user at patakaran sa privacy ng third-party. Walang karapatan at walang obligasyon ang Huawei na kontrolin o salain ang content ng mga produkto at serbisyo ng third-party, kung kaya't walang pananagutan ang Huawei kung sakaling malabag ang iyong mga karapatan dahil sa paggamit ng mga nasabing produkto at serbisyo.
3. Pagpapahintulot at pagkuha ng data
Para mabigyan ka ng mas stable na produkto at naka-customize na serbisyo, ang Huawei at ang mga third-party na service provider na nakikipagtulungan sa Huawei para sa Huawei Health ay kukuha ng impormasyon at/o data ng error kaugnay ng iyong produkto. Sa pamamagitan ng pagpili sa "Sumasang-ayon" sa mensaheng lalabas kapag inilunsad ang Huawei Health app o kapag ginamit ang Huawei Health, sinasang-ayunan at pinapahintulutan mo ang Huawei na kunin at suriin ang sumusunod na impormasyon:
(1) Impormasyon ng device, gaya ng operating system ng telepono, wika ng telepono, modelo ng device, mode ng koneksyon sa Internet ng telepono at impormasyon ng lokasyon.
(2) Impormasyon ng app, gaya ng bersyon ng app, paraan ng pag-download ng app, at ang oras kung kailan binuksan o isinara ang app.
(3) Data ng serbisyo, gaya ng impormasyon ng error sa app at impormasyon ng pag-activate sa serbisyo.
(4) Personal na data na pangkalusugan, kasama na ang, pero hindi limitado sa data ng pag-eehersisyo, pagtulog, timbang, at bilis ng pintig ng puso. Mangyaring sundin ang Clause 2 sa Mga Tuntuning ito kung pinayagan mo ang mga third party na iproseso ang iyong impormasyon.
Para hindi mawala ang iyong data, awtomatikong ie-enable ng Huawei Health ang feature na i-sync sa cloud, na regular na mag-a-upload ng iyong data ng pag-eehersisyo, pagtulog, timbang at bilis ng pintig ng puso sa cloud. Ang data na na-sync sa cloud ay hindi maaaring tanggalin nang sabay-sabay, at permanenteng iiimbak ang mga ito. Kung ayaw mong awtomatikong ma-upload sa cloud ang iyong data, maaari mong i-disable ang feature na awtomatikong pag-sync sa pamamagitan ng pagpili sa "Mga Setting" sa Huawei Health at pagkatapos ay pag-off sa switch na "Awtomatikong I-sync".
Para mapaganda ang karanasan mo sa paggamit ng mga produkto ng Huawei, awtomatikong ibabahagi ng Huawei Health ang data ng pag-eehersisyo at kalusugan na pinahintulutan mong kunin ng Huawei mula sa iba pang mga produkto ng Huawei bilang default, gaya ng Smartcare. Bilang default, ibabahagi rin ng iba pang mga produkto ng Huawei na nauugnay sa kalusugan at pag-eehersisyo (gaya ng Huawei Wear) ang data ng pag-eehersisyo at kalusugan na pinahintulutan mong kunin ng Huawei mula sa Huawei Health. Maaari mong i-disable ang awtomatikong pagbabahagi ng data sa pagitan ng Huawei Health at ng iba pang mga produkto ng Huawei kahit kailan sa pamamagitan ng pagpili sa "Mga Setting" sa Huawei Health at pagkatapos ay pagpili sa opsyong i-disable sa "Mga pinagmumulan ng data".
Para maiwasan ang mga abala sa iyo kapag ginagamit ang Huawei Health, mangyaring pahintulutan ang Huawei Health na awtomatikong i-enable at/o i-disable ang Bluetooth.
Ang personal na impormasyong pinahintulutan mong kunin ng Huawei ay gagamitin alinsunod sa Patakaran sa Privacy ng Huawei. Pakibasa nang mabuti ang content ng Patakaran sa Privacy na ito. Maaari mong basahin ang Patakaran sa Privacy sa pamamagitan ng pagpili sa "Patakaran sa Privacy ng Huawei" sa mensaheng lalabas kapag inilunsad ang Huawei Health, o sa pamamagitan ng pagbisita sa
http://consumer.huawei.com/privacy-policy.
4. Mga panganib at responsibilidad
(1) Ikaw ang may pananagutan para sa anumang mga panganib na nauugnay sa paggamit ng Huawei Health app. Walang ibinibigay na katiyakan ang Huawei na ang Serbisyong ito at ang mga resulta nito ay makakatugon sa iyong mga pangangailangan, o na ang mga serbisyo ng produkto ay hindi mapuputol, at hindi nito ginagarantiya ang seguridad, katumpakan, pagiging napapanahon o legalidad ng mga resulta ng Serbisyong ito at ng data nito. Walang legal na pananagutan ang Huawei kung magkaroon ng mga pagkakataon kung saan hindi mo magagamit ang Huawei Health, kasama na ang, pero hindi limitado sa mga problema sa network, linya ng komunikasyon, website ng third-party at service provider. Maliban na lang kung malinaw na nakasaad na hindi, libre lang ang mga serbisyong ibinibigay sa iyo ng Huawei. Gayunpaman, maaaring kailanganin ng ilang serbisyo na tumawag o sumagot ng mga tawag, mag-access ng mobile data o magpadala ng mga SMS message. Maaaring kang singilin ng mga third party para sa mga serbisyong ito. Ang Huawei ay hindi kukuha ng impormasyong maglalahad ng iyong personal na pagkakakilanlan, maliban na lang kung ikaw mismo ang magbibigay ng nasabing impormasyon.
(2) Kung sakaling magresulta ang iyong pagkilos at/o mga hindi maiiwasang sitwasyon sa paglalahad o pagbubunyag, o sa pagkuha, paggamit o paglilipat ng isang third party sa anumang impormasyong maaaring nauugnay sa iyong privacy o impormasyon na itinuturing mong pribadong impormasyon, ikaw ang may pananagutan para sa anumang mga negatibong epekto nito at hindi ang Huawei.
(3) Ang lahat ng data at resulta na lalabas sa Huawei Health app ay gagamitin lang bilang sanggunian. Hindi namin inirerekomenda ang paggamit ng impormasyong ito bilang batayan para sa medikal na panggagamot o bilang ebidensya ng kalagayan ng iyong kalusugan. Walang pananagutan ang Huawei para sa anumang mga panganib o aksidenteng magmumula sa paggamit ng data o mga resulta sa Huawei Health para sa mga nasabing layunin.
(4) Ikaw ang magbabayad ng anumang mga singil sa mobile data na magmumula sa pagsi-sync ng data sa cloud o sa iyong device.
(5) Hanggang sa sukdulang pinapayagan ng naaangkop na batas, walang pananagutan ang Huawei para sa anumang espesyal, nagkataon, hindi direkta o nagresultang danyos, o kawalan ng tubo, negosyo, kita, data, goodwill savings o inaasahang savings, batay man ang mga nasabing pananagutan sa kontrata, tort (kasama na ang posibilidad ng kapabayaan o ganap na pananagutan) o iba pang mga claim, at nang hindi alintana kung nakikinita ang mga nasabing kawalan o hindi, kahit na malinaw na nasabihan ang mga customer hinggil sa posibilidad ng pagkakaroon ng mga nasabing kawalan o danyos.
(6) Ang sukdulang pananagutan (hindi nalalapat ang limitasyong ito sa pananagutan para sa personal na danyos kung ipinagbabawal ng naaangkop na batas ang nasabing limitasyon) ng Huawei mula sa paggamit ng serbisyong inilalarawan sa kasunduang ito ay limitado lang sa halagang binayaran ng mga customer para sa pagbili ng Serbisyong ito.
5. Mga paghihigpit sa paggamit
Pag-aari ng Huawei at ng mga tagapaglisensya nito ang lahat ng karapatan sa intelektwal na ari-arian na nauugnay sa Software na ito. Maaari mong gamitin ang Software na ito alinsunod sa Kasunduang ito, basta't susundin mo ang lahat ng nauugnay na batas, regulasyon at patakaran, dagdag pa sa mga tuntunin sa Kasunduang ito. Hindi mo maaaring gawin ang, at hindi ka rin maaaring makisangkot sa paggawa ng alinman sa mga sumusunod na pagkilos, kasama na ang, pero hindi limitado sa:
(1) Pagtatanggal ng anumang mga paunawa o pahayag sa copyright o iba pang impormasyon at/o content na napapaloob sa Software na ito.
(2) Pag-reverse engineer, pag-disassemble o pag-decompile ng Software na ito.
(3) Paggamit, pagkopya, pagbabago, pagpapaarkila o paglilipat ng buong Software na ito o bahagi nito nang labas sa sakop ng mga tuntuning nakasaad sa Kasunduang ito.
(4) Paggawang available ng Software na ito sa isang third party, pagbibigay ng lisensya sa iba na gamitin ang Software na ito o paggamit ng Software na ito para sa isang bagay na ipinagbabawal ng Huawei (gaya ng pangkomersyal na paggamit).
(5) Paggawa ng mga sumusunod na bagay sa mga larawan, text at iba pang nauugnay na impormasyong napapaloob sa Software na ito, kasama na ang, pero hindi limitado sa: paggamit, pagkopya, pagbabago, pagdaragdag ng mga hyperlink, muling paggamit, pagko-compile, pagpa-publish, paggawa ng mga mirror site o paggamit ng Software na ito para gumawa ng mga nauugnay at hinangong produkto, gawa at/o serbisyo.
(6) Paggamit ng Software na ito para mag-imbak, mag-publish o magpakalat ng content na lumalabas sa mga pambansang batas, regulasyon at patakaran.
(7) Paggamit ng Software na ito para mag-imbak, mag-publish o magpakalat ng content na lumalabag sa mga karapatan sa intelektwal na ari-arian, lihim ng kalakalan o iba pang mga karapatang legal ng mga third party.
(8) Paggawa ng pagkilos na naglalagay ng cyber security sa panganib.
6. Mga update sa bersyon
May karapatan ang Huawei na magpasya kung magre-release ito ng mga na-update na bersyon ng Software na ito sa hinaharap. Kung magpasya ang Huawei na mag-release ng na-update na bersyon ng Software na ito, malalapat pa rin ang Kasunduang ito sa na-update na bersyon, maliban na lang kung mag-release ng pamalit na "Mga Tuntunin ng Serbisyo ng Software". Kapag nag-install ka ng anumang mga update, ibig sabihin ay sumasang-ayon kang sumunod sa mga nauugnay na Tuntunin ng Serbisyo ng Software. Kung hindi ka sumasang-ayon sa lahat ng content sa mga Tuntunin ng Serbisyo ng Software, huwag i-install ang update.
7. Pagwawakas
Kahit na mapawalang-bisa ang anumang tuntunin sa Kasunduang ito, buo man o bahagi lang, hindi iyon makakaapekto sa bisa ng iba pang mga tuntunin. May karapatan ang Huawei at/o ang mga tagapaglisensya nito na suspindihin o wakasan ang Kasunduang ito kahit kailan. Kapag winakasan ang Kasunduang ito, dapat mong ihinto kaagad ang paggamit sa Software na ito at tanggalin ang lahat ng nauugnay na software at data na kinopya o na-install mo.
8. Choice of Law
Iiral ang mga Batas ng Germany sa Kasunduang ito, liban sa proteksiyong ibinibigay sa iyo ng mga probisyon na hindi maaaring bawasan ng kasunduan dahil sa mga batas sa bansa na iyong tinitirhan (partikular ang mga mandatoryong karapatan sa proteksiyon ng konsyumer).
Huawei Technologies Co., Ltd. Nakalaan ang lahat ng karapatan. May karapatan ang Huawei na bigyang-kahulugan ang content na napapaloob dito hanggang sa sukdulang pinapayagan ng batas.